補選

今日係沙田大圍美林舉行區議會補選，有5個候選人對壘，我哋當然喺為2號民主黨梁永雄助選。

我哋7：30前到達，兵分多路到商場及主要人流通道助選，不久即被對手(4)猿廢柴 (1)里弱雞廿多個助選員包圍；吸取經驗今次無論準備物資 / 人力我方都較以往好得多，故後來落足一個鐘頭大雨，我哋都不慌不忙繼續助選，而對手因冇帳篷遮蓋，只好留低攤檔四散，畫面非常搞笑… …

早上8:30開始，大佬 / 大姐陸續到來助選，對手就嗌咪，為咗唔擾人清夢及唔好令人反感，我哋繼續輕聲地呼籲選民投票；9:30後我哋才開始用有限數的大聲公宣傳，而對手即時打電話叫人車咗好多個擴音喇叭嚟向高空呼叫，這刻連卿姐都頂唔順嘈音，要塞耳仔，選民繞道而避，到我哋檔口投訴對手，及讚我哋斯文有禮貌 … …

下午，冇理頭發生交通意外，里弱雞隨即飛撲到現場，自以為是咁問長問短，而佢嘅大舊衰助選團就成機拍短片做宣傳，之後播出，仲將D大話似是而非咁大大聲講，仲話：『里弱雞當選就有人幫街坊睇英文信』，『里弱雞喺呢個幾月朝朝6點就嚟到派單張，所以好知道街坊需要D乜喎』，試圖掩人耳目當人傻咁。

哈哈…. …天有眼，講大話係有人知架，不久好多選民叫佢收聲唔好再做Show，仲話：『梁永雄議員幫我哋好多，你唔好抵毀佢』及『選舉期間個個候選人都朝朝嚟派單張』

晚上，我哋把握最後機會爭取更多選民投票支持，投票結束前半小時，我哋同大佬富四處巡遊溢口號，希望支持永雄又未投票嘅從速投票… …