北海道之旅 Day 4

第四日同樣俾6:30am morning call 叫醒，同樣係酒店食自助早餐，之後就出發去第一個地方，而今日亦都係我地既盡情購物日。第一站我地先去到小樽，係呢度有好多唔同款式既音樂盒同埋其他獨有既玻璃製品，不過最後我都只係買左個音樂盒送俾人，而玻璃製品就無買到。而且我覺得時間唔夠，如果要買野就會唔夠時間睇其他野，有 1 pair 團友係呢度遲到左半個鐘以上先返到黎

真係有好多款式既音樂盒，有成3層樓俾你慢慢挑選，睇到我地眼花撩亂

最後成功買到個音樂盒，梗係要拎住影番張相啦！

其實成條街幾靚，淨係影相都已經好夠，後尾我地去左玻璃博物館（右下角）度參觀，有好多唔同玻璃品，不過件件都超貴，睇下就好

導遊話黎到小樽一定要食佢地既雪糕，有5段至12段，我地最後試5段果隻，因為已經好大杯，好飽！味道分別係薰衣草、北海道牛乳、植張蜜瓜、士多啤利同埋朱古力，個人認為薰衣草既味道最為驚喜，勁好味！

遊覽完後我地係埋小樽度午膳，雖然岩岩先食完杯雪糕無耐，但係成個午餐我居然可以全部食晒，包括有烤肉、炸雞、飯、烏冬同埋燉蛋，我都覺得自己好厲害

飯後當然唔小得去到小樽運河度影張相啦！不過唔知點解我覺得有d似蘇州既水鄉

仲要有人拉人力車，不過拉車既全部都係後生仔，但係眼見無乜人坐囉！

臨上車前見到櫻花樹梗係要影番張相，不過呢d全部都係小櫻花樹

去完小樽後，我地就去到小倉山競技場，呢道冬天既時候會有滑雪比賽。我地去到有得坐纜車上山頂參觀，而且之後仲見到d未溶雪既冰

去完山頂，又係購物既時候。我地去到狸小路度 shopping ，我覺得呢度同心齋橋無乜分別，都係城市地方，有好多鋪頭同百貨公司。你地唔好睇我淨係拎住一袋野，其實亞發手上已經攞住三袋野，最後戰績係三袋加一箱，最犀利就係今日

晚飯我地係附近既餐廳享用，都係 BBQ，不過今日有所不同就係其中一樣肉係自費，就係我手上既神戶牛扒，要 6500 Yen，即係 $520，雖然係好貴，但係我覺得係唔同d，好食d，肉汁唔錯

飯後我地返酒店 check in，由於今次住係市區，所以可以出去行街。不過導遊有d老點，話由酒店行去「博多不夜天」只需 7 分鐘，但係我地行左成20分鐘，痴線架！所謂「不夜天」即係紅燈區，有好多靚仔靚女出黎拉客去「談情說愛」

最後我地影下相同睇左一陣就算，因為我覺得夜晚好凍，成個鼻凍到無晒熱度，仲要去 7-11 買樽熱茶暖住返酒店先掂