給媽媽的情書

母親節當天,

寫了一封給媽媽的情書,

並在聚會中讀出.

其實一路寫的時候,

真的一路喊,

因為太多我們相處的經歷了.

縱然媽媽有時的行為令我與姊姊不開心,

但從心中,

我知媽是很愛我們的.

給芳姐的情書:

媽,你知嗎?今個母親節對我來說,特別有意義.點解?因為我也快當媽媽了.

正因為這樣,特別感受到你對我的愛.

寫俾你既情書!點樣開始呢?腦內一幕幕與你一起的情景不期然浮起:好細個既時候,細到我都唔幾得幾多歲.因為執地下既香口膠食,被你知道後,一邊沖涼,一面被你打罵至半死,只因你認為我地窮,家中無錢,我窮到要執野食.其實我咁細個,又點識呢d野,我只係好奇同胃食,但我知你當時個心好痛.

另外,住係圍村既時候,你被跌落黎既玻璃樽整穿個頭,縫完針出院我同你講,阿媽你唔好死,死左無人整冬菇俾我食,我知當時你個傷口好痛,但個心好甜.

10歲個時,你差不多病到要死,我咁大個女都未見過你咁辛苦,我同家姐喊住叫你入院,你死都唔肯入,只因你怕你入左院無人照顧我地.個時不知邊到黎既智慧,打俾個aunt,叫佢同我call白車送你入院,你被抬上白車個一幕,至今,我仍記憶猶新,後來醫生話,你其中一邊腎急性壞死,遲1個鐘頭入院,你就無命.回想起,真的感恩,否則2幾年前又多左2個孤兒了.

一路寫,一路回想這些情景,不禁流淚,原來我地3母女真係經歷左好多.曾記得萬梓良同恬妞結婚個時講過,我地3個人一條心.其實呢句話,正正係我對你同姐姐的想法.由細到大,無左爸爸既我,親戚又唔多,係我心目中,最重要就係你同姐姐,而家中,亦都無男人,不期然,我就會覺得我要保護你地.都唔知係先天定後天的影響,我既性格亦相對堅強,硬正.亦可能係因為你同家姐都好鐘意講野,在家我會較沉默,作聆聽的角色,可能亦因為呢d種種既原因,令你同姐姐都唔係太認識我.

你成日話我不似家姐開朗,不似家姐喜歡說話,不似家姐擅於表達.有時我都幾嬲,嬲除左係因為比較,亦更因為你不認識我.識我既人,只有叫我講少d咋.

不過,想真d,邊有母女間沒有誤會,沒有誤解!或許呢d就叫做關係既微妙.我知爸對你造成好多傷害,好多永不磨滅的痛.而呢d痛,我是無法為你解開.唯有求天父給你醫治.但係我真係好想你知(是你由心底的去知),我係好愛賜你,雖然我地仍不時有吵嘴的地方,但係回想媽你對我的愛,不期然,我會覺得內疚.

近幾年,你漸覺身體大不如前,時常有埋怨,不開心的地方.其實我每見你這樣,我的心亦很痛.媽,過往你辛勞的歲月太多,只是近幾年家庭狀況改善了,你不用再憂柴憂米.正正係咁,我更希望見你開心.不要再受以前的傷痛纏累.你在我心目中,永遠是最好的,你不單有內在美,更有外在美.你的身教,不單影響我.我更相信會影響著我的女兒—恩樹.媽,恩樹期待著見你這個婆婆.求天父給你喜樂,平安的心,直到永遠.

愛你的女兒

恩恩上