完成度８０％。。。

。經過連日來既大掃除後，打算要執拾既野，都已經執到七七八八，而家大概仲有２０％就可以執好晒過新年喇，其實呢２０％係可執可唔執既，睇我心情啦，有心情就執，無心情就由佢，ＹＥＡＨ家既精神係，做乜都千其唔好做到１００％，最多９成９好喇，總要留返Ｄ，所謂有餘有餘，哈哈！

。Ｄ野整齊晒，順眼晒，野又差唔多執好晒，人都頓時輕鬆晒同醒神晒！其實有好多野都執過晒Ｄ位，Ｄ佈置同格局完全唔同晒，好有新鮮感。以前做ＳＵＭＭＥＲ　ＪＯＢ時有個大姐姐講過，Ｄ野間唔中換下擺位擺法，會運勢都會轉一轉，唔知係咪心理作用，我而家都覺得精神爽利左，呢幾日凍到十二十三度，但係我都好似平時咁著兩件衫就算（唔厚既衫），又完全唔覺凍喎，成個人強勢到連低溫都唔怕，唔通同我執過Ｄ野有關？唔。。。睇黎，我越黎越迷信喇，哈哈！

。講起執野，計落，都執左成兩個星期，唔係執好多野，但係Ｄ野好零星，多數都係要整理齊整返佢之嘛，但係呢Ｄ又偏偏最花時間，仲有一個唔好既壞習慣，就係執執下見到Ｄ舊野就拎黎睇下研究下，或者玩下，有時又會拎去同妹妹細佬講下笑，難聽Ｄ講句，玩多過執野，所以先要執成兩個星期都仲係執到８０％！

。計計下，仲有十日左右就新年，年三十晚，我屋企會係咁，如果係屋企既話，十二點前（即係大年初一前），一定要沖好涼，過左就唔比沖，要等天光先沖得，仲有，十二點過後，就要食齋，連朱古力同汽水都唔食得個喎，然後就會準備食宵夜，食咩宵夜呢？就係。。。生果盤，我地屋企係咁，只要人在屋企，都要食，我都問過阿爸阿媽好多次，點解要係踏正大年初一後食生果盤呢？佢地都話唔知，傳統上一代係咁傳落黎，我地一定要跟個喎，但係唔知到左我呢代，仲跟唔跟到呢？食完宵夜，阿爸阿媽會派壓歲錢，以前細個只會拎，而家大個，拎完當然要回返一封比阿爸阿媽，仲有個怪規矩，就係男仔當晚唔可以訓，一定要捱到天光先准訓，我記得細個時我係頂唔順訓著左，都會比人叫返醒，大個左就多數出左去行花市行天光，諗諗下都好多年真係大年初一淩晨無訓覺，咁高興，其實都唔會訓，大把野玩嘛，哈哈！

。講返大掃除，其實我公司個位都有執過下，但係唔駛半日又比人搞到亂晒，自己都係幫凶，哈哈！還是算了！

。仍然係好攰呀，攰到都唔想郁，忙埋１號，咁就可以休息下叉夠電過新年，３號會有個驚喜比阿詩，嘿嘿！

。聽講而家電視重播大長金喎，係下晝六點播，即係我無得睇，唉，搞錯呀，我好想睇李英愛，可唔可以搬去夜晚做呀？