講都唔信

各位，好耐冇見！

嘩，印象中都好似未試過成個禮拜先寫一篇網誌，同大家講吓我過去一個星期發生嘅事吖。

我過去一個星期做咗五日兼職。朝早 5:30就要起身，7點幾就要入到大埔。  放工後 與好友相聚食飯，談天說地。差唔多每晚12點幾先瞓，所以好攰！

星期四午膳後，突然覺得個頭好暈。 只係步行上一層樓，個人已經氣喘，個頭 wing wing吓，要企一陣，等個人定番，先繼續去做嘢。 我都好驚，除咗感冒嗰陣時，未試過咁樣暈法。 放工後休息咗一陣，個人又好似冇事，就繼續當日安排嘅事------整牙、見朋友。

由放工坐車開始，去到長沙環地鐵站月台，個人又感覺個頭一陣一陣咁暈， 最後我取消當日整牙同見朋友。 我估自己可能休息唔夠、太攰， 所以頭暈。返屋企休息，瞓多啲就應該冇事。

响屋企休息一陣後就已經冇暈，我諗夜晚一定會好好瞓，因為個人覺得有啲體力透支。

點知嗰晚失眠！？

個人真係好攰，但竟然瞓極都瞓唔着！？

起身 check e-mail，睇DVD，半夜4點上番牀.................

仍然係瞓唔着.....................

最後差唔多5點瞓着。

鬧鐘5:45am響。

好辛苦呀！ 我唔想返工呀！

但份兼職係替工，即係表示我已經係代替別人，如果我唔返，就要麻煩其他人。而且星期五係最後一日，我要做埋啲手尾兼 整理資料交畀下一手，所以決定 頂硬上！

星期五朝早食咗一份豐富早歺，希望有多啲 energy。 成個上晝都撑得住，我用  break嘅時候休息。

午膳後又再暈，自己真係好擔心身體！

我所有家人都唔响香港，如果我响屋企暈倒就好麻煩，我決定去睇醫生。

經醫生檢查後，頭暈嘅原因係............醫生話我貧血。

What????   Me Cell 會貧血？？？

真係講都唔信！！！！！

係人都知我有幾咁 "大隻"，Me Cell 點會貧血？？

係呀！其實响 4月頭我做過身體檢查，因為某啲身體狀況(不便在此透露)，醫生已經話我貧血，建議我食鐵丸同多啲肉。我當時諗我返香港肯定會勁食，所以都無理。

今次頭暈最主要嘅原因係疲勞過度 同食唔夠嘢(套用响我身上有啲攪笑)。醫生開咗補血丸畀我，我呢兩日食番多啲有營養嘅嘢。

呢幾日慢慢好轉，已經冇暈，不過行路唔可以咁快，否則又氣喘， 愎元後真係要做番多啲運動。

以上就係我咁耐冇回覆大家留言嘅原因。 大家都要小心身體呀！