斬倉止蝕

Copied from : Luk Sir's blog at hkheadline.com

我建議定得出止蝕原則的網友，要睇得化啲，明白斬倉止蝕後隻股好可能會反彈，因為大跌後的股票根本就好大機會短線反彈，所以一斬倉就反彈好正常，要預咗佢發生，唔好心痛。

你可能會話，如果炒股要一成止蝕，咁我經常要止蝕噃。若然係咁，就要先問自己，自己的出入市技術係唔係好差呢? 點解次次買親都係一買就回? 係唔係次次都係後知後覺，見到好消息見哂報紙才入市，變咗人地好消息出貨的接貨機器都唔知呢? 在大牛市中，這些後知後覺的接貨機器都好易贏錢，但在熊市中，大走勢向下，反彈浪來得較短，做咗接貨機器唔識止蝕，就會一浪一浪輸錢。

在股海之中，一買一賣才成市場，有人賣股，要有人買股先至得，呢個道理好簡單，但陸羽仁都係要在股市打滾咗好耐先至明白，大戶炒夠要計數走人，唔搵人接貨點離場，但股票一直插唔停，大戶可能都未出齊貨，所以插到咁上下就會大反彈，可能係出貨的大戶反手造出來，股票大跌後反彈，就會惹出大批見過高位貪平接貨的散戶、甚至沽咗貨翻揸的散戶入場，有咁多老散接貨，大戶才能大力出貨。散戶信眼見的股價，就俾人睇住來食了，散戶在佢地認為好抵買的「半高位」不斷接貨。其實買完隻股開始急跌，這種環境只有一種保命之法，止蝕離場。做人要睇得化啲，止蝕之後隻股反彈又好，狂插又好，都唔關你事，笑看風雲啦。