預知的病假日~~

舊事一樁‧放了在草稿一段時間，現在才有時間讓你們看，不好意思因為我慢……

二零零七年  十一月  九日  「晴‧但有霧」

今日冇返工，但就唔好諗住我係去左玩或者係企hea~~因為今日小弟去左醫院睇醫生。事因係今年(2007)既五月四日，小弟曾經係火車上面休克左。咁因為係政府醫院，所以排期排到今日先至有得睇。

咁我今朝一早都唔係訓到好晏咋，九點零就同母親大人去左食早餐。之後搭車去上水。去到醫院十點二十分左右，因為我未試過去呢間醫院，而且我不嬲都冇咩大病痛既，所以我咩都唔識，好多野都好新鮮、好陌生咁。

一去到，開完座係Reception果位姐姐，佢教左我點樣行過去之後，我就跟住佢既指示行去我要去既地方。一去到，佢同我講，你係呢度等等啦，你要【量血壓】同埋【驗小便】……Oh! God!究竟咩事，點解好似好大陣仗咁既………之後咪排隊等囉！好啦，終於都到我喇。量血壓都冇咩野，但係驗小便呢，死喇，我諗緊，如果好黃既，實比人話熱氣，如果有小小壓味既話，實比姑娘笑死啦！但係幾唔願都好，都要做架啦，咁咪入廁所，好在，都唔算好黃，而且冇味，咁我都安心d。之後交比姑娘，佢將張試紙放入去，咁我等左一陣o者，就已經知道結果喇，姑娘佢同我講「冇事」，但係就冇同我講驗黎係做咩，冇事又係點樣冇事！！

之後就要去另一個counter放低張紙等醫生叫名，咁我又係到呆等，等左半個鐘左右掛<因為我冇睇錶>。姑娘哎咪叫我係五號房等睇醫生，咁又等左一陣<其實我又冇咩所謂既，係要等下o者,我覺得自己都唔係d咩大病，所以等下都ok，d公公婆婆比我更加需要睇先既，所以我等係冇所謂既>。

之後姑娘叫我入去，一入到去，個醫生望我既時候，感覺怪怪咁。好啦，咁佢就開始問，佢問我，你知唔知今次黎係做咩！<咪玩啦，我唔知都唔會黎覆診啦。>之後佢又問我之前有冇大病啦，暈既時候既感覺啦，除左呢次，之前有冇過休克啦。

問得都仲好地地，佢突然間問我︰「邊度鄉下」…………心裡超O咀啦，喂！大佬呀，我黎睇醫生架咋，做咩無啦啦問我邊度鄉下喎，對個病冇關係架下華。但我都好有禮貌咁答佢，我係「廣州人」。跟住佢向上指比我睇，我向上望，哦！原來醫生都係姓「聶」架！唔怪得之啦！嚇死人咩！睇醫生問籍貫，我都真係聽都未聽過……咁我就明白到佢點解入黎既時候係咁望住我啦！我仲以為自己咁正添，好似「天屎」話齋(唔止迷倒男生，仲有女仕黎獻欣勤。)哈哈！！不過呢，可能大家都姓「聶」，而且我覺得佢應該都同我差唔多大，所以都幾好傾既！我覺得都算睇得耐架我，都有差唔多成半個鐘架。之後醫生叫我訓上床，佢話要驗江呀………仲咩搞到咁大陣仗……但醫生叫到，唯有照做。

好啦！驗完喇，佢同我講記住黎覆診呀！！！吓！咁咪即係仲有下次……佢亦連帶講埋，你係覆診之前，要【驗血】【Check心電圖】【照X-RAY】【驗便便---仲要分三次拎去比佢驗，每次成份大約係五蚊銀咁大(點解好似煮餸咁既……！？)】喂！唔好搞掛，仲要我請多一、兩日假咁搞，咁真係唔使做囉。所以我寧願一日搞晒。雖然便便唔可以一似過交……咁又即係話，我仲未搞掂，仲要覆診，亦都未知究竟係咩原因而貧血………原主保祐！！

P.S. 願大家都要小心身體，健康冇左就係冇，冇左亦都好麻煩，保重。

P.P.S 之後出左結果喇，醫生話我冇病冇痛呀，之前只係受到d藥物既影響而導致。安樂晒！

占美仔字！