前日拿拿聲去左運輸處擰牌，之後落到樓下買個 P 牌，終於開始做 P 牌仔啦
前晚首先幾米生將架車渣到去將軍澳工業村，之後至到我渣，初初坐上司機會有 D 緊張，因為佢架車比 MISS 架車大好多，唔係好慣，同埋架車唔同 MISS 果架咁有個 BRAKE，成架車真係自己操控
初初開車有少少唔識渣咁，幾米生講得最多一句說話係 "你個牌點考返黎架，咁既技術都 PASS，有冇搞錯"
渣左一陣開始定返 D，最後仲由工業村渣返屋企添，SO FAR 都 OK，不過幾米生就好緊張，一時大叫 "紅燈呀"，一時大叫 "DUP 呀"，驚死我撞左佢架車咁...好彩我技術有返咁上下，所以好順利咁返到屋企..
琴日再操車，今次就試行迴旋處同 CUT 線，初初行真係勁驚，又怕人地撞到我，又怕唔夠快，跟住再渣埋上秀茂坪，原來上山路都幾好玩，越黎越鍾意渣車啦
之後仲試左一次泊位，因為隔離架七人車出左車，所以可以試泊，只要望住自己隔離個位就得，好順利咁泊左位，不過泊到成身汗
今個禮拜六日再操車，大家去將軍澳過馬路時要小心 D 啦!!!
