我的貓仔

之前同男友講過，第時我過到台灣要養一隻虎斑貓仔，佢都幾唔願意之下應承咗我！其實我從來都未養過貓，但係男友帶我去台灣D貓CAFE度玩，接觸過真實既貓仔，真係勁得意勁好玩，就成日心思思想自己擁有一隻！

五月既時候，有一晚佢公司個PARTNER上佢度，竟然尾隨有隻貓仔跟佢入屋喎！佢PARTNER話呢隻貓仔跟住佢行，佢入LIFT，隻貓仔又跟住入LIFT，佢出LIFT，隻貓仔又係跟住佢出LIFT，就係咁一直跟到我男友屋企啦！當時我同男友MSN緊，佢抱上黎俾我睇，成身污糟到死，男友馬上幫佢沖涼，我再睇真D，佢係隻虎斑黎架！好得意，又唔怕人，又勁活潑！我男友問我點算？我話佢好可愛，我好鍾意，咁男友就收養咗佢，成為我隻貓啦！呢D應該算係緣份吧！

我男友第二日抱隻貓去睇獸醫，響獸醫院入面有兩母女，一見到我哋隻貓就話好熟面口，然後就話前排都見到呢隻貓響附近流浪咗一段日子，之前仲俾人潑漆，成身都係油漆呀！後尾有個人見佢咁可憐，就幫佢洗甩大部份漆油，再放返佢出街咋！我男友話貓仔後腳有個地方有漆油洗唔甩，所以嗰兩母女應該冇認錯咁話喎！好陰公呀！原來貓仔都有段咁痛苦既經歷架喎！D人真係離譜，咁得意既貓仔都下到毒手既！

之後做咗我隻貓仔都幾幸福架！雖然咁多個月黎我都未親身過去見佢，但係佢食既玩既住既從來唔會缺乏架！我會搖控叫我男友買野俾佢同帶佢去睇獸醫，上網見到有人整咗D貓玩具，我又會叫我男友學人整俾佢！知道佢以前咁慘，以後都要好好照顧佢！不過你睇上面張相，佢肚腩向天咁瞓得咁安心，證明我男友都幾俾到安全感佢啦！

男友成日話貓仔經常咬佢，話要放生喎！但晚晚見佢同貓仔講野，又同貓仔玩，有時又叫貓仔去個公文袋度咬D數目字紙仔出黎俾我地買六合彩，得閒又同佢練貓拳，就知佢幾錫隻貓啦！日日對住感情實深厚嘛！咪扮野啦！你錫到隻貓仔燶呀！