平和貴

琴晚放左工走左去電髮. 由九點攪到差不多十二點.走的時候仲搭的士返屋企.

個髮形師係同事介紹, 佢鐘意去係因為可以放左工,夜D 去都無問題.同埋同事話好平. 於是乎我琴晚就由九點先開始電.

好平.究竟有幾平呢? 我都唔記得問. 一上去就話電髮.比人攪濕個頭先至問幾錢. 個髮型師話................. HKD230.

我唔係一個大口氣的人,又唔係一個有錢人. 但係今時今日竟然可以用 HKD230 電髮???我好白痴的第一個反應衝口而出..................."咁平?"  白痴都嘔呀~~~

佢用的藥水真係唔差.係 Goldwell  的.仲要係電完無一陣味.同事個個都話好.

好平的電髮之餘,我郤買左十袋好貴洗頭水.

粉紅色個袋係 1400 ml 的洗頭水, HKD250. 而灰銀色個支係啫喱水, HKD45.

咁大個人都未買過一支洗頭水過一百蚊. 今次真係好重手呀. 無法啦.我頭髮質地差.呢排搵極都無支岩咁樣.聽佢講,試下呢支 made in Japan 的洗頭水,睇下係咪真係好d.同埋咁大支,應該可以用半年.