戒片中...

之前講過話幾經辛苦先諗到條屎橋同臭豬b戒奶咀，而家奶咀就搣甩咗嘞，但革命都尚未成功，事關仲有樣超難搞既屎片仲未戒甩。

婆婆由臭豬b十幾個月時已經成日都同我講，臭豬b而家咁大個，要「的」吓佢去廁所，比佢自己控制一下大小二便，如果唔係，就賴尿賴到小學架喇。

我知，我知，依個道理我明，但當時礙於我懶，一味係咁賴天氣凍，遲d先、遲d先，遲到人哋兩歲要返幼兒中心都仲係著住片片返學。

初頭返學時，我每日都放三條戒片褲同四條尿片落佢書包，我以為老師會主動同佢戒片。但我見每日放學返黎，臭豬b都只係會用尿片，戒片褲就原封不動。喺「敵不動、我不動」既情況下，我都無再刻意去諗。直到第一份學習報告出咗，老師話臭豬b大小二便既控制能力麻麻地，好依賴著片，唔係好肯坐痰罐去廁所。有時去廁所都無尿尿或者臭臭，有都係痾喺條片喥，我就知依個係我既責任。係我無好好咁教佢如廁，係我懶唔「的」佢坐痰罐、係我無同佢著底褲仔照比佢「鴨」片任佢痾 .........！！

率之，返咗學一個月後，我真係頂佢唔順仲「鴨」住條片返學放學，我「的」起心肝決定同臭豬b戒日片。我同臭豬b講，而家大個女喇，mAmi唔幫佢著片片喇，片片係瞓覺先著，日頭係要著底褲架，屙尿尿痾臭臭要同mAmi講，要坐痰罐痾架。

臭豬b好明白事理咁話知道。頭一晚，佢忍唔住痾濕咗四條底褲，佢賴咗出黎果野好驚，我知佢驚我唔開心，因為一地都係。不過我一早預咗戒片係咁辛苦，係要成晚攞住條抹布同地拖周圍走既。我明白戒片係需要時間既，佢得果兩歲人仔我可以要求d 咩啫，喺某d位我會好似好有耐性咁既(哈！)，所以我一句都無鬧過佢。

我以為依場戰爭會係好漫長既事，點知，我真係不得不讚吓臭豬b，佢第二晚已經無再賴濕褲仔了。我隔一陣就問佢有無尿尿痾呀？佢通常坐落去唔多唔少都會痾d交功課。到咗第三晚，佢已經唔需要我去問，急尿急屎都識得自動自覺走去廁所攞個痰罐坐了，如果痾得多，佢仲會話︰「好大泡尿呀！」(請鼓掌！)

見臭豬b咁叻叻，我都好開心。返學時同佢老師講臭豬b開始戒片，麻煩老師耐唔耐提佢去廁所啦。接住果兩日，都見臭豬b賴濕咗褲仔要換便服。再過多兩日，接臭豬b放學時佢個班主任同我講，今日問臭豬b去唔去廁所佢又唔答，活動時坐喺地下喥睇住電視賴尿又唔出聲，問我喺屋企係咪咁。我話唔係呀，佢自己識得去架喇，我諗係因為臭豬b喺學校扮鵪鶉所以無出聲啩。於是我就好鬼長氣咁成日提亞b如果急尿就要同老師或者嬸嬸講，叫佢哋帶去廁所，唔可以賴尿呀。之後過兩日，班主任都讚佢有進步，有同佢哋講要去洗手間，我見放學時臭豬b都係著住校服褲就知亞b有耳性嘞。

片片戒緊期間，其實都有好多siDe effEct呀。例如臭豬b唔肯著褲啦，佢喺屋企唔著褲周屋走周不時出現，但依段時間更係變本加厲，有時開住冷氣真係擔心佢凍親腳仔！又例如佢痾完尿學大人用紙巾抹下面啦，但唔多唔少隻手仔又成日都掂到下面，隻手又唔係乾淨過人，搞到我見佢下面有時紅紅哋，有時又會話痾尿痛痛！仲有既係佢試過幾次放學話急尿，大佬，行到半路中途喺邊樹搵痰罐比你呀？最後，我就面懵懵咁帶佢去附近既坑渠痾囉。

各位mAmi，我有問題想問呀︰

而家日片就叫做戒緊喇，咁夜片又應該點戒既呢？

仲有，臭豬b而家慣咗坐痰罐，出街點同佢去殊殊呀？出面d廁所好污糟好多菌喎，如果「的」住佢對大脾去woRk 唔woRk 呢？

煩請賜教！

下圖為我撲到去元朗千辛萬苦先搵到既戒片褲！真係唔係到到有得賣！！