幸運是我

「.......頭先同老婆喺門外等候司儀叫我哋進埸時，突然間令我諗番起以前玩話劇嘅片段。 每次演出開始前，我哋一班演員會喺舞臺兩邊 (粵劇叫做虎度門) 等候，嗰一刻除咗沉默，我心裡面會同自己講，哩晚演出我只會得一次機會，當我一踏上臺板，就算好與壞，我一定要堅持演至謝幕。同樣地，我頭先同老婆喺門外等候時，我都再三同自己講，只要我同老婆一進埸，我就會開始人生中最重要嘅一場戲，而我好肯定，我哩一生只會演哩一埸，唔會比機會自己NG .......」

二零零三年十二月六日晚，我，當住婚宴中200多個賓客，對老婆講出以上婚姻嘅承諾。

老婆，你仲記得以上哩段說嘛 ?

快六年嘞，如果由我哋開始一齊生活計，差唔多八年咯。 我從來未試過有一段感情可以咁長久，但日子耐咗，又會視一切擁有嘅係必然。 其實一段婚姻，真係要用心去經營，先可以好好咁成長。

請放心，我真係徹徹底底明白的。

個天一直都好厚待我，當我碰得焦頭爛額，人生跌至谷底，有你義無反顧咁支持我。我皮氣偏激古怪，有你事事體諒。

你對我嘅付出，太多太多了。 我當中時有問題，多謝你嘅包容。

多謝你 .....

「..... 我哋對阿B能夠做到嘅，就係盡力將佢教好，日後佢長大成人，路要點行，就要靠佢自己。 若果有一天，佢同我哋講要嫁去外國，我哋梗係唔捨得，但都要接受。 我仲有兩年四十歲嘞，如果好命嘅話，可能仲有四十年要過。 而陪我走埋余下日子嘅人，唔會係阿B，而係你 .....」一個無夢的晚上，我對這樣對你說。

我真得需要你，陪我繼續走余下的路。

仲有兩個多月，阿B就出世嘞，好期待哩一日嘅來臨。 我唔係一個富有嘅人，但係有你同阿B，心中嗰份富足平安，實在難以形容。 如果我人生已走了一半，而現在來個小結，我會話 :

我是個幸運的人。

老婆，我愛你。