不可一, 不可再

12 Sep 09 (星期六)

今日下午去 play town 玩左4個鐘, 回程既時候 zenith 已經好攰.

一上巴士即瞓. 返到屋企沖涼之後, 又再帶bb出發去同娘家食飯.

可能bb有D唔夠瞓, 成晚都坐唔定, 好快就話要落地.

仲話要街行, 我見自己支可樂水仲有少少, 就比BB試下飲.

一心想引誘佢安靜咁坐多陣, 飲第一啖, 反應怪怪地,

雙眼變紅, 但係個口又唔想離開支飲管.

再飲, 嘩~~~ 好似發現新大陸咁呀! 雙眼發亮, 仲陰陰嘴笑~~

跟住就好開心咁一啖一啖咁飲, 每一啖都嗒真味道, 非常 HAPPY.

BB好快就飲晒支可樂, 飲晒就好唔開心, 準備喊.

我見舅父個支可樂仲有少少, 咁就比埋bb飲.

話咁快佢又飲晒, 飲晒之後竟然"變臉", 面容180度扭曲.

好嬲, 好嬲咁喊, 最激係突然玩"爆樽", 失控咁將支可樂樽掉上枱度.

由佢出世以來, 我都未見過佢咁嬲. 當"爆樽"個剎那,

我竟然覺得好好笑, 一種好天真既情緒表達, 盡顯真我個性.

本來想開口話佢, 但係見佢真係好嬲咁喊, 又覺得好滑稽.

一個小朋友遇上人間極品, 抵受唔住誘惑, 應該算是本能反應吧!

想起一句廣告口號 :

不可一, 不可再!