500D - Happy B'day to Pan

尋晚同左一大班朋友食飯, 慶祝好朋友 Pan 既生日, 係度講句生日快樂先, 而我亦都第一次拎部 500D 出街,之後我都只係係屋企亂影下, 我自己都好開心呀.

識左10 幾年, 由中四讀書識到而家, 一諗起好多中學時代既畫面出晒黎, 上堂訓覺, 打 gameboy, 食野乜都齊, 係勤力讀書呢樣冇做姐, 日日放學唔係打波就去打機. 轉個眼就10 幾年.

Pan 哥, 生日快樂, 聽你講下年同碧結婚, 首先恭喜你先啦, 有乜要幫手出聲啦, 我都可以幫手駕花車既, 哈哈, 但人情就............

今次鏡頭用窮人三寶之一, canon 50mm f1.8 黎影, 好輕易就做出淺景深效果. 但我對部 500d 都未好熟, 有一半相都唔多見得人. 不過熟能生巧, 慢慢黎啦.

食飯前粉人 (因為佢塊面搽左粉, 一影相掂倒機, d 粉就痴晒上部機到, 所以我叫佢粉人) 對我部相機好有興趣係咁影, 咪睇下佢影乜囉, 但佢影黎影去都影唔清個人, 對唔倒焦囉, 所以都係我影啦, 你睇, 清晒. 

好友既新女朋友第一次見面, 好靜, 有少少怕醜, 一定係俾爛 gag 王嚇親喇.

單鏡遇上單鏡, 好似d 西部牛仔開槍對決咁. 但點解有個人係中間架. o靚仔唔想死既走遠d.       

佢不但止冇走開, 仲兇我添.

幾條友仔圍晒係度玩乜?

原來係係度玩梗話事pair, 007 果種呢, 唔知鬼咩名, 但都幾好玩, 玩到吐血咁滯.

三位女士既合照, 有少少手震其實.

病左都黎, 都算係咁啦雞哥, 病雞今日食量只係平日食量既十份一, 我估佢返到屋企應該頂唔順, 煮兩個出前一丁, 加大量腸仔, 丸, 仲有獅子狗.